text│amy photo│him edit│sieg
炸雞髀是不少人的 comfort food，一隻出色的炸髀，一定要皮夠脆、有肉汁、無雪味，最好仲要夠大隻。已經食過大名鼎鼎的日月星、三多、很得輝嘅大炸髀，記者推介你嚟挑呢隻來自油麻地蚊型茶記的高水準出品。
這隻 hidden leg 位於油麻地碧街，門面毫不起眼，開業數年，打躉街坊原來大部分衝着這炸髀而來，是區內名物。炸髀到底有幾巴霸？首先單係 size 已經先聲奪人，老闆 Edmond 豪氣選用美國特大炸髀製作，一隻雞髀閒閒地有 1 磅，長度近9 吋，好誇張！
最正食落無雪味，雞髀要浸鹽水解凍，去除雪味，醃髀前還會𠝹幾刀攤平，令它望落更大件之餘仲更易熟又更入味。醃料醃法是這隻炸髀的靈魂，Edmond 說：「醃法是一位韓國師傅教我的，學韓國人用水果醃肉，其豐富酵素可分解雞髀蛋白質，令肉質更軟嫩。我的雞髀會用新鮮菠蘿、甘筍、檸檬、番茄、洋蔥等蔬果醃足 4 小時，食落零舍 juicy。」醃好後的雞髀會先以 250℃ 焗熟，接到柯打後再落炸爐以 200℃ 滾油炸香。
炸得色澤金黃的炸雞髀，有一股熱氣自手上擴散，一口咬落去，咔嚓一聲，肉汁在口腔爆出，非常澎湃。雖不是生炸，但也做到了外皮炸得透徹香脆，肉質全熟又保持嫩滑、肉汁多多。沒有蘸上麵包糠炸般咁𠝹口，加上雞髀已半起骨，食落更啖啖肉。
美味解鎖：
和順記
地址：油麻地碧街24號地下
電話：9868 7962
營業時間：星期一至六 7am - 7pm，星期日及公眾假期休息
